Më 30 Tetor, nga ora 13:00 deri në mesnatë, në Lulishten “Ismail Qemali”, Bllok, Bulevardi Dëshmorët e Kombit, do të zhvillohet eventi i përvitshëm Guida Studentore - Festa e Mirëseardhjes së Studentëve. Ky event, i organizuar nga Qyteti i Tiranës në bashkëpunim me Këshillin Studentor dhe të gjitha universitetet publike, ka për qëllim të mirëpresë studentët e rinj dhe t’i ndihmojë ata të orientohen në qytet dhe në jetën universitare.

Ngjarja është konceptuar si një piknik informues dhe festiv, ku studentët do të kenë mundësinë të njihen me mundësitë e punësimit, teknologjinë, sportin, artin dhe aktivizmin rinor. Për më tepër, do të ketë një fokus të veçantë në mobilitetin me biçikleta dhe promovimin e artistëve të rinj.

Pasdite, nga ora 17:00 deri në mesnatë, eventi do të transformohet në një festë me muzikë live, ku do të performojnë artistë të njohur si All Shadows (Headliner), Silø, Tezzito, dhe Erta Agolli b2b Deja Beqiri.

Eventi synon të krijojë një atmosferë mikpritëse dhe tërheqëse për të gjithë studentët, duke u ofruar atyre një eksperiencë të veçantë për të nisur vitin e ri akademik në Tiranë.